VM-GULLdagen til Anita Håkenstad Evertsen i bilder ! - KONDIS - norsk organisasjon for kondisjonsidrett

Artikkelen fortsetter under annonsen

VM-GULLdagen til Anita Håkenstad Evertsen i bilder !

Denne bildereportasjen supplerer pressemeldinga som vart sendt frå Sveits og lagt ut HER på Kondis.no like etter løpet 8. september. Må lesast ! Anita Håkenstad Evertsen, tok ein historisk GULLMEDALJE for Noreg i VM i langdistansefjelløp i Jungfrau Marathon i Sveits. Orda strekk ikkje til !


	Anita i flott driv 250 meter før målstreken etter ein 42 km lang GULL-OPPTUR med 1839 høgdemeter samla stigning frå Interlaken og opp til Kleine Scheidegg ovanfor Wengen. I bakgrunnen er er fjelltoppane Eiger ( 3970 moh), Mönch ( 4105 moh) og Jungfrau ( 4158 moh) praktfulle kulissar for eit VM-Gull. Den snøkledde toppen rett over hovudet på Anita er Mönch. I foto-øyeblikket har nok fotografen høgre puls enn Anita. For å rekke opp til mål frå forrige foto-punkt og drikkestasjon for Anita ved 37 km måtte eg sprinte omlag 3 km og 375 høgdemeter ( med 5 kg sekk !) opp ein short-cut til mål ! Dei siste 4 åra har eg styrt trenings- og konkurranseintensiteten min med utgangspunkt i at makspulsen min var 180 etter ein test på Toppidrettsseteret i 2003. I bakkane opp mot mål viste pulsklokka 183! Eg ville oppleve at Anita sprang i mål som verdsmeistar ! Foto Christian Prestegård


	YES ! Anita passerer 37 km og 1750 moh i suveren leiing ! Orda kan ikkje formidle begeistringa mi akkurat der og då. For då Anita passerte Lauterbrunnen etter 25 km ringte ektemannen Frank Evertsen opp til meg, som sto på 37 km, og sa at Anita låg på 4 plass og klaga over krampe i begge leggane. Ho hadde ikkje tålt all asfaltløpinga i stor fart på dei raske fyrste 25 km. No skulle det vise seg at motbakkedronninga Anita ikkje trengte å løpe mange minuttane opp dei bratte bakkane frå Lauterbrunnen mot Wengen (1284 moh) før ho var i leiinga. Her har også fotografen forholdsvis høg puls etter fyrst å ha gjeve Anita drikkeflaska ved 37 km og så sprinta forbi for å ta dette biletet. Foto Christian Prestegård


	Anita på opptur med full kontroll mot det høgaste punktet i løypa 2205 moh som ligg rett i kant med toppen av hovudet til Anita. Medan Anita må følgje løypa ned i dalen til høgre og opp på moreneryggen, skal eg kaste på meg den blå sekken som ligg til venstre for Anita og springe det beste eg kan ei kortare løype til mål. Dette bildet er teke ca 1790 moh mellom Mettlenalp og Wengeralp som du ser i løypeprofilen nedanfor. Det er omlag 500m opp til Wengeralp 1858 moh. Der går løypa ned til Wixi og inn i den bratte fjellstien ( som er merka med gult i løypeprofilen ) opp mot det høgste punktet. Sjå bildet nedanfor frå 2050 moh. Foto Christian Prestegård


	Anita går i mål som suveren Verdsmeistar i langdistansefjelløping på tida 3.23.05. Tida er kun 2 min. bak løyperekorden til Marie-Luce Romanens som i år vart nr. 8 på tida 3.42.51. Den 39 år gamle tre-barns mora frå Beitostølen har klart det kunststykket å vinne både EM- og VM-gull i Motbakkeløping/ Fjelløping same året ! Foto: Remi Steinegger.


	Dette bildet er teke 2050 moh midt i den brattaste stien opp mot det høgste punktet Eigergletcher 2205 moh. Her stig løypa 25-30% omlag som skogsstien i Skåla 1848m rett opp. Det forrige bildet vart teke på grusvegen som du ser til venstre for min venstre peikefinger. Etter løpet såg eg TV-opptak av Anita der hos spring som ei fjellgeit oppover denne bratte stien. Konkurrentane hadde meir enn nok med å gå opp og tidsdifferansen ned til nr. 2 og 3 vart på heile 8 og 13 min. i mål ! Dette bildet vart teke dagen før løpet av arrangøren i samband med gjennomløping av dei siste 17 km av løypa opp Lauterbrunnen. Det vart ein ubeskriveleg flott OPPTUR. Arrangøren kallar løpet sitt for Verdas Vakraste Maraton. Det sluttar eg meg til når det gjeld dei siste 17 km opp frå Lauterbrunnen. Orda strekk ikkje til. Neste år gjer eg garantert Come-Back som maratonløpar i Jungfrau Maraton 6. september, 13 år etter siste maratonløp. Bli med du også ! Skal du springe eit fjell-maratonløp utanfor Noreg må det bli Jungfrau Maraton !


	Leggproblema til Anita er omtala under bilde nr. 2 ovanfor. Ektemann og coach Frank Evertsen var raskt på plass etter målpassering og gav Anita VIP-leggmassasje. Foto: Remi Steinegger


	Anita vart midtpunktet også under blomster-seremonien i målområdet på Kleine Scheidegg 2100 moh. Her saman med nr. 2 Elena Kaledina og Nr. 3 Jeanna Malkova, begge frå Russland. Foto: Christian Prestegård


	Dei to Verdsmeistrane Anita Håkenstad Evertsen og Jonathan Wyatt (frå New Zealand ). Både Anita og Jonathan tok sine fyrste GULL i VM i Landistanse-Fjelløp. Jonathan har vore den store frontfiguren for fjelløping med heile 6 ulike VM-gull. Han har også løyperekorden i Jungfrau Marathon på 2.49.02 frå 2003. Foto Christian Prestegård


	Jonathan Wyatt, New Zealand, passerer Wengeralp 1825 moh. Her leiar han med 2 min på Hermann Achmüller frå Italia. I mål var avstanden 3 min. Foto Christian Prestegård


	Hermann Achmüller frå Italia spring flate maratonløp på 2.18, og debuterte som motbakkeløpar i Jungfrau Maraton. Det såg ut som han storkoste seg oppover løypa og han jubla for 2. plassen som om han hadde vunne løpet. I mål var han 3 min bak Jonathan med tida 2.58.35. Her passerer har han 37,25km. Foto Christian Prestegård


	Ranulfo Hernandez Sanchez, Mexico, passerer 37,25km med korte kjappe steg, men dei vart ikkje kjappe nok til å kopirere bronsemedaljen frå motbakkeløp-VM i 2002. Ranulfo vart nr. 4 på 3.05.56 vel 10 min bak Wyatt og 3 min bak Italienaren Frick Gerd på 3. pl. Foto Christian Prestegård


	Det vart litt av ein folkefest i målområdet då 4.300 deltakarar kom i mål og minst like mange tilskodarar, supportarar og sponsorar hadde teke turen til Kleine Scheidegg denne praktfulle solfylte dagen ! Foto Christian Prestegård


	Det var reine folkevandringa til og frå målområdet. Foto Christian Prestegård


	Anja Carlson, Tyskland, tok kraftig inn på Jeanna Malkova den siste kilometeren til mål, men det vart 4 pl. 15,4 sekundar frå bronsemedaljen på tida 3.36.59.


	Claudia Landholt, Sveits, vart nr. 5 på 3.37,58. Foto Christian Prestegård


	Det var fest og underhalding frå start til mål i årets løp. Her frå målområdet. Det må ha vore meir enn 10 ulike orkester ute i løypa som løfta stemninga til store høgder. Foto Christian Prestegård

Årets VM i langdistanse-fjelløp hadde den største og beste deltakinga som har vore i VM i fjelløping. Det var heile 14 nasjoner blant dei 20 beste i dame- og herreklassa og det var 4.300 deltakarar frå over 40 land.

Jungfrau Maraton er eit av verdas tøffaste maratonløp. Løpet starta i Interlaken 566 moh og mål var på Kleine Scheidegg ovanfor Wengen 2.100 moh. Det høgste punktet i løypa var Eigergletscher 2205 moh. Den samla stigninga var på 1839 høgdemeter. Sjå løypeprofilen ovanfor.

Dei 10 beste damene i VM i langdistanse-fjelløp (Mountain Running Long Distance):

 
1. Anita Håkenstad Evertsen, Norge 3.23.05
2. Elena Kaledina, Russland        3.31.16
3. Jeanna Malkova, Russland        3.36.43
4. Anja Carlsohn, Tyskland         3.36.59
5. Claudia Landolt, Sveits         3.37.58
6. Elisabeth Hawker, England       3.40.00
7. Corinne Zeller, Sveits          3.41.12
8. Marie-Luce Romanens, Sveits     3.42.51
9. Britta Müller, Tyskland         3.45.22
10.Daniela Wyss, Sveits            3.46.27

Dei 10 beste menn:

 
1. Jonathan Wyatt, New Zealand     2.55.32
2. Hermann Achmüller, Italia       2.58.35
3. Gerd Frick, Italia              3.02.41
4. Ranulfo Sanchez Hernandez, Mex. 3.05.56
5. Galen Burrell, USA              3.11.05
6. Serguej Kaledine, Russland      3.11.28
7. Marc Lauenstein, Sveits         3.13.41
8. Zac Freudenburg, USA            3.14.58
9. Serhiy Oksenyuk, Ukraina        3.15.28
10.Urs Jenzer, Sveits              3.15.47

Alle resultater frå Jungfrau Maraton 2007 finn du HER !

Denne bildereportasjen supplerer pressemeldinga som eg sendte frå målområdet i Kleine Scheidegg ovanfor Wengen like etter løpet 8. september, og som Kjell Vigestad la ut på kondis.no like raskt som han fekk den frå Sveits ! Les pressemeldinga på Kondis.no her !

Les også førehandsomtalen på kondis.no 6. september

Her kan du friske opp att minnene frå 8. juli då Anita tok EM-gull i motbakkeløp: Historisk EM-gull !

11. august vann Anita sitt tredje strake NM-gull i motbakkeløp på Fanaråken 2.068 moh i suveren stil:
Klikk på: NM i motbakkeløp 2007

Del artikkelen